Wala sang may nabaton nga financial assistance ang pamilya ni Arniel Bajinting nga isa ka freelance agent sang hardware supplies nga napatay sa sunog nga nagluntad sa Java Pension House.
Sa interview sang Bombo Radyo Bacolod sa asawa nga si Evelyn, ginpanidugan sini nga dapat may salabton ang tag-iya sang pension house sa kamatayon sang iya bana.
Madumduman nga nalakip sa sunog ang tag-iya nga si Christopher Java, 12-anyos nga bata nga si Miguel, iloy ni Christopher nga si Magdalena kag yaya nga si Ronalyn Dacalio sang Barangay Abuanan, Bago City.
Magluwas sa ila, patay man ang duty sa front desk nga si Arnold Filomeno.
Suno kay Mrs. Bajinting, wala pa sang may nagpakig-angot sa ila nga pamilya Java sa kun ano ang mahatag nga bulig sa ila kasunod sang kamatayon sang iya bana.
Samtang, ginkumpirmar naman sini nga wala pa sila nakapauli sa Cebu bangud may gina-asikaso pa sila nga papeles agud madala ang bangkay ni Arniel.
Indi man ini sa gihapon makapati nga napatay ang iya bana.
Suno diri, mabuot, mapinalanggaon, kag indi pabaya nga klase sang padre de pamilya si Arniel.
Samtang, ginpasalig sang Bacolod City Police Office (BCPO) nga bisan indi na mag-tap sa ila ang pagatukuron nga task force nahanungod sa nagluntad nga sunog sa Java Pension House, magapatigayon sila sa gihapon sang imbestigasyon sa kun ano ka matuod nga may yara sang nagluntad nga alleged motornapping antes natabo ang sunog.
Sa interview sang Bombo Radyo Bacolod kay Police Lt. Col. Ariel Pico, spokesperson sang BCPO, ginpahayag sini nga may yara sila sang nabaton nga report nga may yara sang mga persona nga nagtuyo kuntani nga I-short circuit ang motor sa ground floor sang pension house agud nga mag-start para makawat.
Apang, imbes nga mag-start nag-spark ini kag nagkalayo.
Suno kay Pico, ginakumpirmar pa ini karon sang ila mga imbestigador.
Magapatigayon man sila sang koordinasyon sa Bureau of Fire Protection agud makakuha sang mas kumprehensibo nga impormasyon.
Dugang pa sang tagpamaba sang BCPO nga ila pa karon ginatinguhaan nga makakuha sang iban nga CCTV footages sa iban nga establisyemento malapit sa Java Pension House agud makadugang sa kasanagan sang imbestigasyon.
