BACOLOD CITY — Aprubado na sang committee on civil services sa Kamara de Representantes ang hagna nga magatukod sang permanente nga opisina sang Professional Regulation Commission sa ciudad sang Bacolod.
Suno sa author sang hagna nga si Bacolod City Lone District Congressman Greg Gasataya, gin-aprubahan sang komitiba sang Miyerkules sang aga (Marso 7) ang House Bill 3808 kadungan sang hearing nga ginpatigayon.
Wala man sang miyembro sang komitiba nga nagpamatok bangud bisan ang PRC mismo ang pabor sa pagbutang sang opisina sa ciudad.
Suno kay Gasataya, madugay na nga tinuig nga nagatabok pa sa Iloilo ang may yara sang transaksyon sa amo nga ahensya.
Bangud lusot na sa committee level ang hagna, magahimo na sang committee report agud nga ma-adopt sang plenaryo.
May yara naman sang senador suno kay Gasataya nga nagpabutyag nga bukas ini nga magsponsor sang hagna sa Senado.
