Nangin maayo ang resulta sang pagbutang sang ciudad sang One Stop Shop para sa mga maparehistro kag magkuha sang business permits.
Sa interview sang Bombo Radyo Bacolod kay Stella Rose Rayos, pinuno sang Permits and Licensing Division sang Bacolod, ginpahayag sini nga kapin lima ka libo na ka mga registered business establishments ang nagparehistro humalin sang ginbutang ang One Stop Shop sa Bacolod City government center sang Enero 3.
Bisan adlaw san Sabado, naga-operate ang Permit and Licensing Committee, assessment kag payment, magluwas sa mga barangay kag iban pa nga ahensya sang gobyerno.
Suno kay Rayos, mas maayo nga magparehistro na ang mga business owners sa government center samtang ara pa ang One Stop Shop agud indi na sila mabudlayan sa pagkadto pabalik agud makompleto ang kinahanglanon sa paggawa ukon pagrenew sang permits.
Maka-avail man sang 10 percent discount ang tanan nga magbayad sang full payment kun sila ang magproseso sang permits sa One Stop Shop.
Samtang, nagpanugyan man ini nga siguruhon nga makuha ang kopya sang business permit.
Nagpanawagan man ini nga sundon ang tanan nga mga proseso sa pagkuha sang permits kag renewal sini agud indi magsiraduhan ang ila establisyemento.
Suno kay Rayos, tubtob Enero 20, 2020 lamang ang schedule sang One Stop Shop.
