Ginsurrender sang lolo sang ginatudlo nga person of interest sa nagpatay sa 38 anyos nga iloy sa Brgy Sicaba, Cadiz City sa mga kapulisan sa nasambit nga ciudad ang iya apo para sa safe keeping bangud nga madamo na ang nagakadto sa ila nga balay kag ginatudlo nga ang persona ang may kahimuan sang krimen.
Sa interview sang Bombo Radyo Bacolod kay Police LT Daleen Grace Loreno, Deputy Chief of Police sang Cadiz City Police Station, ginsurrender sang Lolo ang apo bangud may yara sang nagasulong sa ila nga balay nga nagatudlo nga ini ang naghimo sang krimen.
Suno kay Loreno, ang mga kapulisan ang wala man nagabase sang ebidensya paagi sa heresay lamang bangud nagakinahanglan sila sang eye witness kag dapat may yara ini sang affidavit sa pagtindog sini nga witness.
Wala man naghimo sang judicial confession ang ginsungka nga persona.
Suno sa deputy chief of police nga temporaryo karun nga yara sa ila kustodiya ang nasambit nga persona agud nga malikawan ang pagluntad pa sang mas malain pa nga hitabo bangud mainit pa ang sitwasyon sa karun.
Sa karun padayon pa ang imbestigasyon sang mga kapulisan sa insidente samtang gina-follow-up man nila ang resulta sang postmortem examination sang biktima.
Nagapanawagan man ini sa mga pumuluyo sa mga posible nga nakawitness sa may kahimuan sa nagluntad nga krimen, makig-angot lang sa mga kapulisan kag ginasiguro man sini nga mahatagan ang mga ini sang nagakaigo nga proteksyon.
Madumduman nga wala na sang kabuhi sang masapwan ang isa ka babayi nga wala na sang pang-idalom nga panapton sa Sitio Kapasyanon, Barangay Sicaba, Cadiz City sang Mayo 21 sang hapon.
Ginkilala ang biktima nga si Jenny Ann Delano, 38-anyos kag residente sang nasambit nga lugar.
