Nagdangat na sa 18 ang positibo nga kaso sang Covid-19 sa syudad sang Bacolod.
Si Patient No. 18 ang isa ka 32 anyos nga personal driver sang isa ka opisyal sa Kapitolyo sang Negros Occidental kag residente sang Purok Pine Tree, Brgy. Bata, Bacolod City.
Sa interview sang Bombo Radyo Bacolod kay Dr. Grace Tan, tagpamaba sang Inter-Agency Task Force against COVID, ang driver ang nakitaan sang sintomas sang COVID sa katapusan nga semana sang Mayo kag nagpaidalom ini sa RT-PCPR test sang Hunyo 5 bangud sa rekomendasyon sang employer sini.
Ang test ang ginpatigayon sang Teresita Lopez Jalandoni Provincial Hospital Molecular Laboratory kag kaina sang aga naggwa ang resulta.
Suno kay Tan, nakapatigayon na sila sang contact tracing sa 11 ka mga na-close contact sang pasyente apang nagapadayon pa ang contact tracing sa tanan nga nakapalapit kag nakaupod ni Patient number 18.
Gilayon naman nga ginsaylo sa isolation facility ang pasyente.
Samtang ginkompirmar man ni Negros Occidental Provincial Administrator Atty. Rayfrando Diaz nga private driver sang isa ka opisyal sang probinsya kag indi direct hire sang provincial government si Patient 18.
Indi pa man maathag sa karun kun elected ukon permanente nga opisyal sang probinsya ang employer sini.
Suno kay Diaz, sang nakitaan ini sang sintomas gilayon man ini nga gindala sa provincial health office agud ipaidalom sa test.
Gin-athag man sini nga wala sang kaangtanan ang provincial government sa pasyente.
Ginkompirmar man sang Punong Barangay sang Brgy. Bata, Bacolod City nga nakalockdown na ang lugar kun sa diin nagapuyo ang pasyente.
Suno kay Punong Barangay Lito Abaring, ginpabantayan na sini sang mga Barangay Kagawad ang lugar agud indi sagad ka gwa ang mga residente kag tinguhaan na lamang sini nga mahatagan sang tubig kag foodpacks sa sulod sang 14 ka adlaw.
Ginpahayag man sini nga indi sini kilala ang pasyente bangud nagarenta lamang ini sa lugar.
