Personal Grudge ang ginalantaw nga motibo sa pagtiro sa anay contractor kag karun isa na ka quarry operator sa Santa Catalina, Negros Oriental.
Madumduman nga pilason ang isa ka contractor matapos ginluthang samtang sakay sa motorsiklo sa National Highway sang Sitio Lagtang, Barangay San Pedro, Santa Catalina, Negros Oriental.
Ang biktima ang ginkilala nga si Engr. Angelito Mendoza, 58 anyos, contractor, residente sang Brgy. Manalongon, Santa Catalina.
Ini ang nakaangkon sang duha ka igo sa likod, isa sa baga kag isa sa tiil.
Sa interview sang Bombo Radyo Bacolod kay Police Captain Edjel Tablate, Officer in Charge sang Sta Catalina Municipal Police Station, ang biktima ang nagapabilin sa karun sa ospital kun sa diin personal ini nga nagpadulong didto agud nga maestorya ang biktima sang makadali.
Suno kay Tablate, padayon pa ang ila nga imbestigasyon sa pagtiro sa biktima kag may yara na sila sang person of interest kag wala pa sang mga ini nakuhaan sang affidavit ang biktima.
May yara man sang police personnel nga nakabantay sa hospital kag ginabisitahan man sang katapo sang Santa Catalina Municipal Police Station ang balay sang biktima sa Brgy. Manalongon.
Sa karun personal grudge ang nakita nga rason sa pagtiro sa biktima.
