Nagdangat na sa lima ka mga police pesonnel nagikan sa Bacolod City Police Office ang nagpositibo sa coronavirus disease 2019 matapos magpositibo sang Miyerkules ang isa ka patrolman.
Sa interview sang Bombo Radyo Bacolod kay P/Lt. Col. Ariel, ginpahibalo ini sang isa ka admin officer sang BCPO nga may dugang nga nagpositibo sa ila hanay kun sa diin isa ini ka patrolman nga temporaryo nga naka-duty sa Police Station 6.
Suno kay Pico, ang personnel nga nagpositibo ang nagabantay sa ginatiniran sang mga locally stranded individuals (LSIs) nga naka-quarantine.
Posible suno sa tagpamaba nga diri sini nakuha ang virus.
Natalana naman nga idisinfect ang Police Station 6.
Nahibaluan nga sa lima ka mga police personnel nga nagpositibo, duha diri ang nagikan sa Mobile Patrol Group nga naka-assign sa Police Community Precinct sa Purok Mahimulaton, Barangay Banago; isa ang nagikan sa admin; isa ang naghalin sa Police Station 9 nga nagpa-swab test sa BAYS Center kag isa ang patrolman nga naka-assign sa Police Station 6.
Sa karon suno kay Pico, padayon ang pagpangita sang contact tracing team sang BCPO sa mga naka-closed contact sang mga nagpositibo.
