Personal nga nagpadulong ang pila ka mga personnel sang Energy Regulatory Commission (ERC) sa ciudad sang Bacolod matapos ang na-eksperinsiyahan nga mga fluctuation sa kuryente.
Suno kay Bacolod City Legal Officer Atty. Romeo Carlos Ting Jr. magluwas sa pagreklamo ni Bacolod City Mayor Alfredo “Albee” Benitez sa fluctuation, nagpadangat man sang reklamo ang Riverside Medical Center bangod naeksperinsiyahan man sini ang kaangay nga insidente ilabi na sang Hunyo, kun sa diin makapila nga beses nagluntad ang fluctuation sa kuryente.
Personal nga nagpadulong ang personnel sang ERC agud mag-imbistigar sa rason natuhoy sa natabo nga fluctuation.
Gani suportado sang mga ini ang plano nga pagfile ni Benitez sang class suit batok sa Central Negros Electric Cooperative (CENECO) kag National Grid Corporation of the Philippines (NGCP).
Dugang pa ni Ting, sila nakapatigayon naman sang hearing sa senado angot sa nagakatabo nga voltage fluctuation.
Samtang, subong man nga adlaw magapadulong ang personnel gikan sa National Electrification Administration (NEA) central office para ma-umpisahan ang cleansing sang listahan sang mga botante sa plebisito para sa Joint Venrure Agreement sa tunga sang CENECO kag PrimeElectric Holdings.
