Ginahulat pa ang sabat sang Bacolod Yuhum Foundation kun ginhatagan sang permit nga maka-operate ang mga peryahan sa Bacolod City Public Plaza.
Sa interview sang Bombo Radyo kay Councilor Jason Villarosa, chairperson sang Committee on Tourism sa Sangguniang Panlungsod, sa pagkahibalo sini ang nahatagan sang permit amo ang mga peryahan sa Bacolod City Government Center kag Reclamation Area.
Suno diri, ginavalidate pa kun may yara sang gin-aprubahan nga extension sang mga peryahan sa plaza.
Apang, kun mapamatud-an nga wala sang permit ang mga ini, ila pahalinon ang anum ka peryahan nga nahamtang sa plaza.
Ang mga peryahan ang nahamtang sa atubang sang simbahan kag mensahe sini sa mga devotee nga ila paga-imbestigaran kun may yara sang panahoran sa plaza.
Samtang, ginpahayag ni Bacolod City Mayor Alfredo ‘Albee’ Benitez nga kun wala sang permit ang mga peryahan nga naga-operate sa Bacolod City Public Plaza, sila ang pauntaton kag pahalinon.
Suno sa alkalde, ipatsekyar sini kun may permit ang mga peryahan sa plaza para mag-operate.
Suno diri, ang naaprubahan lamang nga permit amo ang sa Bacolod City Government Center kag Reclamation area nga peryahan.
Bangod nga may yara sang nagkomento nga wala nagakaangay nga ibutang ang peryahan sa atubang mismo sang simbahan, suno kay Benitez ginhatag sang simbahan sa Bacolod Yuhum Foundation ang pag-manage sang plaza.
