Ginkumpirmar sang isa ka manugbaligya sa Bacolod City Public Plaza nga duha lamang kaadlaw nga nag-operate ang peryahan kag gilayon man nga nag-untat.
Suno kay Rene, duha lamang kaadlaw nga makita nga nag-operate ang peryahan kag wala nagpadayon.
Suno diri, wala man sang madamo nga tawo nga nagapadulong sa peryahan.
Dugang pa sini nga sang ginpamangkot sini ang isa sa nagatrabaho sa peryahan kun ngaa wala na sila nagbukas, sabat sini nga sila ang nagkaproblema sa permit.
Suno kay Rene mahimo nga may yara lang sang dako nga tawo nga nagpasalig nga mahimo maka-operate ang peryahan sa plaza apisar nga wala pa sang permit.
Madumduman nga kahapon, ginpahayag ni Bacolod City Mayor Alfredo ‘Albee’ Benitez nga kun wala sang permit ang mga peryahan nga naga-operate sa Bacolod City Public Plaza, sila ang pauntaton kag pahalinon.
Suno sa alkalde, ipatsekyar sini kun may permit sa pag-operate ang mga peryahan sa plaza.
Suno diri, ang naaprubahan lamang nga permit para sa peryahan ang yara sa Bacolod City Government Center kag Reclamation area.
