Ginkumpirmar sang station commander sang Bacolod Police Station 1 nga ginkakas na ang peryehan sa Bacolod Public Plaza.
Sa interview sang Bombo Radyo Bacolod kay Police Major Elmer Bonilla, naestorya na sini ang tag-iya sang peryahan kag gin-abisuhan sang Bacolod Yuhum Foundation nga kakason ini santo man sa direktiba sang alkalde bangud indi manami sa mata sang mga nagalagaw ukon nagabisita sa public plaza.
Suno kay Bonilla nakita man sa social media nga indi manami sa imahe sang San Sebastian Cathedral kag Bacolod Police Station 1 nga may peryahan sa atubang sini.
Ginpahayag man sang station commander nga bisan may pahanugot ang Bacolod Yuhum Foundation sa pagbutang sang peryahan, mas maayo nalang nga kakason bangud ang administrasyon ang wala nagpasugot.
Ang peryahan ang ginsaylo sa carnival sa bahin sang Bacolod City Government Center.
