Ginpadala mismo ni Atty Jomax Ortiz ang nabatun sini nga kopya sang ginapapirmahan nga papelis kabaylo sang P100 para sa petisyon para sa Constitutional amendment.
Sa interview sang Bombo Radyo Bacolod kay Ortiz, agud ma-amyendahan ang 1986 constitution, may-ara sang tatlo ka pamaagi nga ginalakipan sang constituent assembly, constitutional convention kag people’s initiative.
Sa pag-amyenda sang konstitusyon, mahimo naman nga complete overhaul kaangay sang ginduso sadto ni former President Rodrigo Duterte nga ligwatun ang system of government gikan sa Republican kag himuon nga Parliamentary ukon ang partial amendment kaangay sa karun nga ginaduso nga amyendahan ang economic provisions.
Suno kay Ortiz, gintinguhaan naman sadto nga patigayunon ang people’s initiative sang 1992 sa administrasyon ni former President Fidel Ramos kag sang 2006 sa pagpamuno ni former President Gloria Macapagal Arroyo.
Apang ang duha ka people’s initiative ang gindeklarar nga defective sang Commission on Election (COMELEC) kag Korte Suprema.
Ang sa karun nga petisyon nga nagalibot sa pila ka mga Barangay sa ciudad sang Bacolod ang isa lamang ka page.
Suno kay Ortiz, ini ang kaangay man sa people’s initiative sang 2006 kun sa diin nakabutang ang pangalan sang petitioner, address, pirma kag thumb mark, apang halos isa ka sentence lamang ang description.
Paathag sang abogado nga dapat nakapagkit kun ano ang mga luyag lamang nga bag-uhon kaangay sa pagpalawig sang term of office sang local officials ukon sang presidente sa pungsod.
Suno diri, kun magpapirma lamang sa kaangay nga petisyon, kaangay nga gina-into ang mga pumuluyo kag ginatago ang matuod nga kaundan sang tinutuyo.
Wala naman ini nagbuya pa sang pangalan sang mga opisyal nga nagapalibot sang petition paper nga ginapapirmahan kabaylo sang P100.
Dugang pa sini nga indi man masegurado kun gikan sa Malacanang ang petisyon ukon inisyatibo lamang sang pila ka opisyal.
Apang ginalantaw man ni Ortiz nga mahimo ginahibalo lamang sang nagaduso sang Constitutional Amendment nga mahibaluan kun ano ang reaksyon sang publiko.
