BACOLOD CITY – Wala pa madesisyunan ni Bacolod RTC Branch 54 Judge Eduardo Sayson ang hingyo ni Ricky Serenio, ang bagman sang Berya Tolentino Drug Group, nga makapiyansa sa kaso sini nga illegal possession of explosives.
Sa madumduman nga sadtong naarestar ini sa ciudad sang Talisay tinalikdan nga Enero 8 sa kaso nga Grave Coercion, nakuhaan ini sang caliber 45 pistol kag isa ka fragmentation grenade sa iya nga posesyon, rason nga nadugangan ang iya nga kaso.
Kaina sang aga, gindala si Serenio sa Hall of Justice sa ciudad sang Bacolod para sa hearing sang Petition for Bail sini kun sa diin kaupod man si Moises Padilla Mayor Magdaleno “Magsie” Peña nga amo karon ang nagakustodiya sa iya.
Nag-abot man ang explosives expert sang Bacolod City Police Office (BCPO) nga si Demmy Montoya nga una nagpahayag nga isa ka granada ang nakumpiskar kay Serenio apang sang ulihi, ginbawi sini bangud suno sa iya, wala sang unod nga polbora kag detonator ang granada rason nga indi ini makalupok.
Sa sini, ginhatagan ni Judge Sayson sang lima ka adlaw ang prosekusyon kag subong man ang kampo ni Serenio, paagi sa abogado sini nga Atty. Erickson Cepeda, sang lima ka adlaw agud magpasa sang tagsa nila ka memorandum.
Dapat iplastar sang magtimbang nga bahin kun ngaa dapat kag indi dapat pahanugutan si Serenio nga makapiyansa.
Una na nga nakapiyansa si Serenio sa kaso sini nga Grave Coercion.
