Ginpakigbahin sang executive director sang Emergency Operations Center (EOC) sa syudad sang Bacolod nga naubos na sa pagpanagtag ang Pfizer vaccine sa Bacolod City Government Center kahapon ilabi na sa sektor sang mga overseas Filipino workers (OFW).
Suno kay Bacolod City Administrator Em Ang, naubos na ang 2,340 doses sang Pfizer vaccine sang syudad matapos ginbakuna kahapon sa Bacolod City Government Center samtang may gamay naman nga nabilin nga ginbakuna sa Ayala Mall.
Samtang ginpakigbahin man sini nga magluwas sa nag-abot nga 51,000 doses sang COVID-19 vaccine sang tinalikdan nga semana, may nag-abot man nga 20,000 doses sang Sinovac vaccine kahapon nga gintalana para sa 2nd dose.
Ginpaathag naman ni Ang nga prayoridad sa vaccination ang mga overseas Filipino workers (OFW) kag A1, A2 kag A3 categories.
Ini bangod may mga pungsod nga nagarequire nga mga nabakunahan na ang mga indibidwal nga magasulod sa ila pungsod gani prayoridad ang mga OFW ilabi na ang manuglakat na.
Ginatublok naman sa mga OFW ang mga bakuna nga Pfizer, Astrazeneca kag Johnsons and johnsons.
Suno diri kun ang schedule sang paglupad ang alang-alang na para sa paghulat ang ikaduha nga dose, ginapili nalang sang mga ini nga Johnsons and johnsons ang ibakuna bangod single dose lang ini.
Ginpakigbahin naman sini nga madamo sa mga walk in nga nagpabakuna ang mga OFW.
Nahibalaun nga ginbuksan ang mga mall para sa walk in gani nagdagsa ang mga luyag magpabakuna sa SM City Bacolod kun sa diin madamo sang mga nagreklamo nga wala nagakasunod ang social distancing.
Apisar sina record high sagihapon ang vaccination sa syudad sang Bacolod.
Ginpakigbahin man sini nga nagdangat sa 1,422 ang mga nabakunahan sa vaccination center kahapon kag masobra 1,200 naman sang nagligad nga adlaw.
As of Friday, ang kabug-usan nga nabakuna ang nagdangat na sa 110,000 doses.
Ginalantaw naman ni Ang nga 70 porsyento sa populasyon ang nagalaaom nga magahatag sang kapin 80,000.
Paathag sini nga 434,000 ang eligeble population sa Bacolod ukon yara na kita sa 18 porsyento antes malab-ot ang herd immunity.Samtang, natalana nga dapat matapos ang pagbakuna sang 30,000 doses sang COVID-19 vaccine nga yara sa syudad sang Bacolod sa Hulyo 29.
Suno kay Bacolod City Administrator Em Ang, executive director sa Emergency Operations Center (EOC), may nabilin pa nga supply sang AstraZeneca vaccine kag Johnsons and Johnsons vaccine.
Nagapati naman ini nga sarang mabakuna tanan sang syudad ang gin-alukar nga bakuna kaupod na ang mga ginbakal mismo sang syudad antes paman ang deadline.
Ginpakigbahin sini nga magluwas sa mga vaccination program sa mga barangay kasubong man sa mga mall nga ginakabig mega vaccination center, may mga vaccination drive man nga ginpatigayon ang syudad.
Kahapon ginpatigayon ini sa Bacolod City Hall of Justice kun sa diin ginbakunahan ang mga abogado, personnel kag ila mga pamilya.
Kasubong man nga napatigayon na ini sa Home for the Aged kun sa diin prayoridad nga ginbakunahan ang mga tigulang.
Ini ang kabahin naman sa nagkalainlain nga vaccination strategy sang EOC.
Ginpakigbahin man ni Ang nga nadelay sang apat ka adlaw ang delivery sang Sinovac nga gikan sa National Government para sa 2nd dose kun sa diin nag-abot lang ini kahapon.
Ginalantaw naman sang City Administrator liwat na makaumpisa ang vaccination sa Bacolod sa Lunes.
Samtang ginpakigbahin man ni Ang nga may panibag-o nga pagsulundan ang Department of Health (DOH).
Panugyan sang ahensya nga dapat masunod ang interval sa 1st kag 2nd dose sang Sinovac vaccine nga 10-12 ka semana agud nga mangin mas epektibo.
Nagpangayo naman sang pasaylo si Ang sa nangin pagdagsa sang mga luyag magpabakuna sa SM City Bacolod.
Agud indi na maghulat sa linya ang iban, ginpang hatagan nalang ang mga ini sang numero sa linya agud nga magbalik nalang sa Lunes ang indi malab-utan.
Paathag sini nga ang average nga ginabakunahan sa mall kada adlaw ang nagadangat sa 500 tubtob 600 apang kahapon, nagdangat ang mga ini sa 1,432.
Nagapangayo naman ini sang pasaylo sa mga nagpadulong sa vaccination venue apang wala maakumodar bangod 1st come 1st serve ang ila nga ginasunod kun sa diin prayoridad sa gihapon ang mga nakaschedule na santo sa vaccination masterlist.
Apang kun may bilin naman nga mga bakuna, amo palang kag naga-akumodar sila sang walk in.
