Makabig na nga nag-resign sa police service si Police General Nicolas Torre III kasunod sang iya pagpungko bilang general manager sang Metropolitan Manila Development Authority (MMDA), suno sa National Police Commission (NAPOLCOM).
Ginpahayag ni NAPOLCOM vice chairperson kag executive officer Ralph Calinisan, kasunod sini, mahimo na nga magkapot sang four-star rank si PNP acting chief Police Lieutenant General Jose Melencio Nartatez Jr.
Suno diri, ang pagpungko ni Torre sa MMDA ang nagahatag sang kaathagan sa police organization, ilabi na sa lebel sang liderato.
Samtang, ginpahayag ni PNP spokesperson Police Brigadier General Randulf Tuaño nga magahulat ang police organization sa Malacañang nga i-promote si Nartatez sa four-star rank.
Madumduman nga gin-relieve sa pwesto si Torre bilang PNP chief sang Agosto 25 kag ginbuslan sia ni Nartatez.
Isa sa mga rason amo ang indi pagsunod sini sa mando sang NAPOLCOM sa reassignment sang key officials.
