Kalakip ang lima ka mga Negrense players sa Philippine Blu Girls, ang National Softball Team nga magasabak sa 30th SEA Games nga magabukas sa Sabado.
Sa interview sang Bombo Radyo Bacolod kay Lizviminda Jalandoni, iloy ni Kaith Ezra Jalandoni nga pitcher sang National Softball Team, ginkompirmar niya nga may yara sang lima tanan ka mga humalampang ang national team nga nagikan sa Negros Occidental.
Duha ang nagikan sa banwa sang Hinoba-an nga amo sanday Lyka Basa kag Janet Rusha, samtang yara man si Mary Joy Maguad nga naghalin sa banwa sang Candoni.
Nalakip man ang isa nga nagikan sa banwa sang Moises Padilla nga si Celestine Palma kag yara man si Kaith Ezra Jalandoni sang ciudad sang Talisay.
Suno kay Jalandoni, una nga nakasulod sa line-up si Celestine Palma, ginsundan ni Lyka Basa, nagsunod si Ezra nga anak ni coach Lizviminda, ginsundan ni Janet Rusha kag ang ulihi Mary Joy Maguad sang Candoni, Negros Occidental.
Ang lima ang kabahin sang Softball team sang Negros Occidental sang sila ang yara pa sa highschool.
Nagwish naman sang goodluck si Jalandoni para sa iya mga anay players.
]Makuha sang Philippine Softball team nga Philippine Blu Girls ang ika-napulo nga gold medal subong nga tuig kun sila ang magchampion sa 30th Southeast Asian Games.
Apisar sa mga madamo nga isyu ang ginapangatubang sang organizer sang 30th SEA Games kaangay lamang sa indi maayo nga pagkaon nga ginpreparar sa mga players apang wala sang reklamo ang national softball players.
Sa karun nagatinir sa isa ka dorm sang Philippine Sports Arena ang mga atleta, kadungan sang ila pagpanghanda ang ululupod nga pagbiyahe padulong sa Clark, Pampanga para sa ila nga training.
Gintu-ad man sang iloy ni Ezra kun paanu ini nangin kabahin sang National team.
Suno diri, halin pa sang highschool ang iya bata sang ini ang gintanda-an na nga mangin player sang National Team, apang ginpatapos niya kay Ezra ang tanan nga requirements sang Dep-ed antes nila ginpasugtan ang nasambit nga player agud maghampang para sa National Team.
