Ginkumpirmar sang Philadelphia 76ers nga indi anay pagpahampangon sa preseason ang ila sentro kag former NBA Most Valuable Player (MVP) nga si Joel Embiid samtang ginapaayo-ayo pa sini ang injury sa nawala nga tuhod.
Ini ang kabahin sang preparasyon para sa mas maayo nga kondisyon sa pagbukas sang regular season.
Gin-anunsyar sang 76ers ang desisyon matapos wala nag-upod si Embiid sa preseason games batok sa Minnesota Timberwolves sang Sabado kag batok sa Boston Celtics sang Domingo.
Suno sa team, padayunon sagihapon sang 30-anyos nga basketball star ang individual treatment plan.
Madumduman nga si Embiid ang nakahampang lamang sa 39 games sang nagligad nga regular season bangud sa injury sa wala nga tuhod kun sa diin nagpaidalom pa ini sang operasyon sang Pebrero.
Kaupod man siya sa Team USA nga nakakuha sang gold medal sa Paris Olympics apang nangin mahinay ang performance bangud sa injury issue.
Subong nga season, ginakabig ang 76ers nga daku nga balabag sa reigning champions nga Boston Celtics sa Eastern Conference apang ginalantaw man sang analysts nga mahimo lamang nila ini kun mapabilin nga healthy sanday Embiid kag Paul George nga lunsay may history sang injury.
