Nagpromisa ang board of directors kag mga top officials sang Philippine Health Insurance Corporation (PhilHealth) nga magarelease sang Interim Reimbursement Mechanism (IRM) sa mga ospital sa Western Visayas.
Nahibaluan nga nagpagwa sang pondo ang Philhealth para sa mga ospital sa bug-os nga Pilipinas bilang kabahin sa programa nga IRM nga nagalaom nga makabulig sa pag-atubang sa COVID-19 crisis.
Una na nga nakabaton sang dalagko nga balor ang National Capital Region (NCR) apang ginakatingala nga wala pa nakabaton ang pila ka mga ospital sa Region 6.
Ang Western Visayas Medical Center pa lang sa bug-os nga rehiyon ang nakabatun sang pondo nga nagabalor P130 million.
Sa interview sang Bombo Radyo kay Bacolod City Lone District Congressman Greg Gasataya, ginkumpirmar sini nga nagpromisa ang board of directors kag mga top officials sang PhilHealth nga magarelease sang IRM para sa Western Visayas sa ila ginpatigayon nga imbestigasyon sa Kongresso sang Martes.
Suno kay Gasataya, P1.8 billion ang budget para sa 33 ka mga accredited hospitals sa rehiyon lakip na ang Corazon Locsin Montelibano Memorial Regional Hospital nga makabaton sang P4.1 million.
Suno sa iya, ginahulat na lang ang perma sang presidente sang ahensya agud marelease na ang pondo sa mga ospital.
Madumduman nga una na nga ginpahayag sang kongresista nga bulan pa lang sang Marso sang nagsulat ang Regional hospital nga luyag mag avail sang programa.
Natapos naman ang Memorandum of Agreement sa tunga sang CLMMRH kag Philhealth sadtong Hulyo 7.
