Gintawag sang Pilipino sa California, nga useless ambassador si Philippine Ambassador to US Jose Manuel “Babe” Romualdez.
Ini kasunod sang mensahe sini sa mga Pilipino nga wala sang papelis sa pagsulod sa America nga mag-andam na sa pagpungko ni US President-elect Donald Trump.
Ini bangod isa sa mga focus sang Trump Administration amo ang mapabalik sa tagsa ka pungsod ang mga illegal migrants.
Sa Interview sang Bombo Radyo Bacolod kay Allan Mandid, Bombo International News Correspondent derekta sa Long Beach, Orange County sa Southern California, USA, democratic state ang California apang daog si Trump sa popular votes.
Apang bangod lain ang sahi sang eleksyon sa America, nagdaog si US Vice President Kamala Harris sa electoral board ilabi na nga dako ang impluwensya sang Hollywood sa mga opisyales sang estado.
Sa paghangop ni Mandid, ang target lang gid ni Trump amo ang mga illegal migrants nga nagtabok paagi sa border.
Pahanumdom sini nga apisar may mga illegal migrants nga Pilipino, ang mga ini ang documented bangod naglabay sa airport.
Suno diri, sa una nga pagpungko ni Trump bilang Presidente, ginsugilanon ini sadto sang Philippine Ambassador to US nga buligan ang mga Pilipino kun sa diin madamo ang nagrant nga makaangkon sang papelis.
Nangin panindugan sadto ang kontribusyon sang mga Pilipino sa ekonomiya sang Estados Unidos partikular na sa health sector.
Suno diri, dapat nga amo man ang himuon ni Romualdez imbes nga ipanawagan nga mag-andam na ang mga Pilipino nga wala sang nagakaigo nga dokumento kag sila ang dapat buligan.
Nagapati ini nga negosasyon lamang ang kinahanglan, kag nakita man ni Trump ang kabilidhon sang mga Pilipino.
