Para sa 3rd Infantry Division sang Philippine Army, ang pagpatay sang New Peoples Army sa mga inosente nga indibidwal ang nagapakita nga luyag nila nga pahugon ang mga tawo agud magpalayo sa mga kapulisan kag kasuldadohan.
Sang Martes, ginpatay ang negosyante nga si Juvie Sarona, 42 anyos, sa sulod sang puluy-an sini sa Purok Kawayan, Barangay Bug-ang, Toboso, Negros Occidental.
Ginkumpirmar sang hepe sang Toboso Municipal Police Station nga gin-ako na sang New Peoples Army paagi sa gin-issue nga statement nga sila ang nagpatay kay Sarona.
Sa interview sang Bombo kay Lt.Col. JJay Javines, spokesperson of the 3rd Infantry Division, ginkasubo sini ang natabo nga kun ngaa dapat gid nga patyon ang inosente nga tawo bangod lamang nga malapit ini sa law enforcers ilabi na sa katapo sang Philippine Army kag kapulisan, kag ihambal lang nga ginpatay sa rason nga ini asset sang gobyerno.
Suno kay Javines, ini nagapakita nga matuod gid lamang nga ang mga nagpatay kay Sarona amo ang mga terorista.
Dugang pa sini, luyag lamang sang mga terorista nga pahugon ang mga tawo agud mapalayo ang mga ini sa mga suldado kag kapulisan kag indi makahatag ang mga impormasyon.
Apang suno kay Javines, madamo sang pamaagi para magpadala sang mensahe bangod nga kun wala sang pagbuligay indi mauntat ang mga ini nga insidente sang pagpamatay.
