Ginaverify pa sang 79th Infantry Battalion sang Philippine Army kun lehitimo nga mga miyembro sang Moro National Liberation Front (MNLF) ang mga nagatukod sang base camp sa Barangay Tinampaan, Cadiz City.
Sa interview sang Bombo Radyo Bacolod kay Lt. Col. Arnel Calaoagan, Commander sa 79th Infantry Battalion, sila ang nakabatun sang impormasyon nga ang mga natungdan nga grupo ang wala ginakilala sang pamunuan sang MNLF sa Mindanao.
Dugang pa nga sila ang wala ginhatagan pahanugot sa pagtukod sang MNLF camp sa bisan diin man nga bahin sang Visayas.
Apang paathag ni Calaoagan nga sila ang yara pa sa proseso sang validation.
Suno diri, humalin sang 2021, may mga namonitor na nga aktibidad gikan sa grupo apang sa lain nga bahin sang probinsya kag karun lamang nagpanaog sa ciudad sang Cadiz, kun sa diin ang ila nga ginatukod nga base camp ang yara pa sa sulod sang area sang subdivision.
Ginpasalig man ni Calaoagan nga ang grupo ang indi armado, gani wala sang dapat ikahangawa ang publiko.
Ang Philippine Army ang nagakoordinar man sa Cadiz City government, kun sa diin una naman nga nagmando si Cadiz City Mayor Salvador “Bading” Escalante sa pagpauntat sang construction sa ginatukod nga base camp, vgbangod sila ang wala sang building permit.
Sa impormasyon nga nabatun sang Bombo News Team, ginpadal-an na sang notice ang nagapakilala nga MNLF members nga maghalin sa lugar sa sulod sang 15 ka adlaw.
