Ginkumpirmar sang commander sang 62nd Infantry Battalion sang Philippine Army nga magahatag sang bulig-pinansyal ang Armed Forces of the Philippines (AFP) sa pamilya sang ginpatay nga si Corporal Mark Anthony Quiocson.
Madumduman nga si Quiocson ang ginluthang sang ginapatihan miyembro sang New People’s Army sa Barangay Luz, Guihulngan City, Negros Oriental sadtong Hulyo 1.
Sa interview sang Bombo Radyo Bacolod kay Army Lt. Col. Melvin Flores, ginpahayag sini nga may yara sang mga benepisyo nga pagabatunon ang pamilya sang nagtaliwan nga suldado.
Magluwas diri, may ihatag man nga bulig ang local government unit sa mga himata ni Quiocson.
Samtang, ginkumpirmar naman sini nga nakahanda na ang AFP kag Philippine National Police sa pagpasaka sang kaso batok sa mga suspetsado.
Suno diri, may yara na sila sang identity kag lead sa mga suspetsado.
Nagapati naman ang battalion commander nga murder ang ginhimo sang ginapatihan apat ka mga kalalakihan nga miyembro sang Special Partisan Unit (SPARU) sang NPA bangud nga magluwas sa gintiro na nila ang suldado sang makapila ka beses, ginkakas pa sang mga ini ang helmet kag ginluthang sa ulo.
Magluwas diri, ginkuha pa sang mga suspetsado ang issued firearm sang biktima, kwarta, ATM cards kag iban pa nga mga gamit.
Ginpasalig naman ni Flores nga hatagan gid nila sang hustisya ang kamatayon ni Quiocson nga kabahin sang Community Support Program sang 62nd IB.
