Liwat nga nagpanawagan ang Philippine Army sa mga kandidato nga indi maghatag sang campaign fee ukon permit to win sa mga miyembro sang New People’s Army.
Suno kay Brigadier Gen. Inocencio Pasaporte, commander sang 303rd Infantry Brigade, igavalidate sang Philippine Army ang mga report nga may pila ka kandidato sa ila area of operation nga ginpangayuan sang New People’s Army sang kwarta kabaylo sang pagpangampanya.
Suno kay Pasaporte, mangita pa sang ebidensya ang hanay sang militar apang nakabaton na sila sang report nga may ginpadal-an sang extortion letters.
Ginalantaw ni Pasaporte nga may ginapadala nga feelers ang mga miyembro sang NPA bangud mahina na ang ila finances gani kinahanglan nila sang makuhaan sang pondo.
Aminado ang Army official nga indi man gid madamo ang mga kandidato nga ginpadal-an sang sulat bangud nagapang-extort ang mga ini sa LGU nga may yara sila sang presensya.
Suno kay Pasaporte, nagapadayon ang ila security operations agud matawhay ang eleksyon kag para ini sa kaayuhan sang tanan nga kandidato.
Sa tion nga mapamatud-an nga naghatag sang kwarta, ang kandidato ang kasuhan sang paghatag sang suporta sa terorista santo sa nakabutang sa Anti-Terror Law.
Ang kaso ang ipasaka sang regional prosecutor sa Region 6.
