BACOLOD CITY-Magapatigayon lamang sang simple nga flag raising ceremony kag magahatag sang mensahe nahanungod sa pagkomemorar sang 34th anniversary sang EDSA People Power revolution ang 303rd Infantry Brigade sang Philippine Army.
Sa interview sang Bombo Radyo Bacolod kay 303rd IB commander Col. Inocencio Pasaporte, ginpahayag sini nga bangud sa coronavirus disease 2019(COVID-19) scare, gin-abisuhan sila nga likawan anay ang paghiwat sang dalagko nga mga pagtililipon.
Apang, ginhatagan-pagtamod ni Pasaporte nga ang EDSA People Power Revolution ang nagapakita sang “unity” sang mga Pilipino.
Dugang pa sini nga indi dapat pagpatalangon ang mga bag-ong henerasyon sa karon sa matuod-tuod nga kahulugan sang demokrasya.
Subong nga adlaw, Pebrero 25, ginadumdom sang mga Pilipino ang “bloodless revolt” nga naghilway sa Pilipinas sa kamot sang diktatorya.
