Ginalauman sang tagpamaba sang 3rd Infantry Division sang Philippine Army nga makilala na subong nga adlaw ang napatay nga gina-alegar katapo sang New People’s Army (NPA) sa engkwentro nga nagluntad sa Sitio Caranawan, Barangay Amontay, Binalbagan, Negros Occidental kahapon sang aga.
Sa interview sang Bombo Radyo Bacolod kay Lt. Col. J-Jay Javines, nagluntad ang engkwentro pasado alas-5:00 kahapon sang kaagahon, matapos makabatun sang report ang 62nd Infantry battalion nga may presensya sang armado mga indibidwal nga nagapangayokayo sang pagkaon, nagapangilkil kag nagapatigayon sang recruitment activity.
Pahayag sini nga naglawig sang lima ka minutos ang engkwentro batok sa ginabanta lima man nga nabilin nga katapo sang nadismantle na nga Central Negros 1 nga grupo sang NPA.
Ang engkwentro ang nagresulta sa pagkapatay sang isa ka gina-alegar NPA member samtang santo sa mga nakita nga tinulo sang dugo sa encounter site kag withdrawal route sang mga rebelde, ginalantaw nga may-ara pa sang pilason sa mga nakapalagyo.
Narecover sa encounter site ang isa ka highpower kag isa ka low powered nga mga armas luthang, personal nga kagamitan sang mga rebelde kag mga dokumento nga may mataas nga intelligence value.
Padayun pa ang imbestigasyon sang Scene of the Crime Operation sa bangkay samtang sila ang nagahulat naman sang dugang nga impormasyon.
Nagalaom si Javines nga makilala na ang napatay subong nga adlaw bangod ginapatihan nga residente sa probinsya sang Negros Occidental.
