Gin-athag sang pinuno sang Division Public Affairs Office (DPAO) sang 3rd Infantry Division sang Philippine Army nga katapo sang New People’s Army ang maglive-in nga napatay sa engkwentro nga nagluntad sa tunga sang 79th Infantry Battalion sang Philippine Army batok sa gina-alegar New People’s Army sang Martes sang hapon sa Sitio Nabalas, Barangay Canlusong, banwa sang E.B Magalona, Negros Occidental.
Sa interview sang Bombo Radyo Bacolod kay Lt. Col. J-Jay Javines, may yara sila sang nagakaigo nga ebidensya nga makatudlo nga sanday Vargas kag Salgado ang katapo sang NPA.
Suno kay Javines, madamo man sang anay katapo sang rebelde nga grupo nga nagbalik na sa sabak sang gobyerno nga makatudlo sa maglive-in nga napatay sa engkwentro nga kaupod nila sadto ang duha.
Suno diri ang pamilya ni Christian Vargas ilabi na ang amay sini kag ang isa niya kautod nga napatay sa engkwentro ang katapo sang New People’s Army.
Samtang, ginpahayag man ni Javines nga kun matuod ang alegasyon sang iloy ni Vargas nga si Jocelyn Vargas nga nadulaan siya sang kwarta matapos ang engkwentro, imbestigaran man ini sang Philippine Army kag kun matuod ang alegasyon, mahimo man ini mabayaran sang nasambit nga unit sang Philippine Army.
Kaangay lamang sang natabo sadto sa Barangay Kapitan Ramon sa ciudad sang Silay nga gin-islan sang 79th IB kag Silay City government ang nagkalaguba nga atop kag kagamitan sang mga residente.
Makapila man sadto estoryahon sang pamunuan sang 79th IB si Jocelyn Vargas agud mangin palaagyan kuntani sa pagsungka sang amay ni Christian kag sang utod sini agud nga makaavail sang bulig gikan sa gobyerno apang wala gid sang nagsungka.
Sa karun padayon pa ang ila nga koordinasyon sang Philippine Army sa EB Magalona Municipal Police Station agud mahibaluan kun may yara existing warrant of arrest sanday Vargas kag Salgado.
