Ginpasalig sang tagpamaba sang 3rd Infantry Division sang Philippine Army nga padayon ang ila nga operasyon batok sa New People’s Army apisar nga Paskwa ukon holiday season.
Madumduman nga duha ka mieymbro sang NPA ang patay sa nagluntad nga engkwentro batok sa 11th Infantry Battalion sang Philippine Army sa Sitio Libjo, Barangay Napacao, Siaton, Negros Oriental sang Disyembre 24 sang gab-i.
Sa interview sang Bombo Radyo Bacolod kay Army Major Cenon Pancito III, spokesperson sang 3rd ID sang Philippine Army, ginpahayag sini nga kinahanglan ipabilin gid sang tropa sang gobyerno ang pressure batok sa makawala nga grupo agud malikawan ang pagpatigayon nila sang tactical offensive.
Suno kay Pancito, ang natabo nga engkwentro batok sa pito ka mga NPA members sa banwa sang Siaton sang nagligad nga Huwebes ang resulta sang paghatag gilayon sang impormasyon sang mga pumuluyo nga may yara sang presensya sang mga makawala nga grupo sa ila nga lugar agud magpang-recruit.
Suno kay Pancito, wala pa natumod ang pangalan sang duha ka mga NPA members nga napatay apang gindala na sa punerarya ang bangkay sang mga ini.
Dugang pa sang tagpamaba nga tuman ka agresibo sang recruitment sang NPA sa Siaton bangud nga strategic location nila ini.
Liwat naman ini nga nagpanawagan sa mga katapo sang NPA nga magbalik na sa sabak sang gobyerno.
Nahibaluan nga masobra 200 ka mga NPA members na ang nagsungka sa gobyerno sang nagligad nga tuig.
