May nakaplastar na nga contingency plan ang 303rd Infantry Brigade sang Philippine Army para sa 2025 Midterm Elections kasubong man sa mahimo paglupok sang Bulkan Kanlaon.
Sa ginpatigayon nga peace covenant signing sang mga electoral candidates sang Negros Occidental sa Negros Occidental Police Provincial Office Head Quarters, kalakip si 303rd IB Commander Brig Gen Ted Dumosmog sa mga nagpanguna.
Ginpasalig sini nga ang militar ang magabantay sa seguridad sang mga kandidato, botante kag election officials sa 2025 Midterm Elections.
Sila ang magadeploy sang 800 enlisted personnel ukon mga suldado gikan sa tatlo ka Infantry Batallion, kasubong man sa Brigade sa Negros Occidental kag Negros Oriental.
Magapadala man sila sang 200 ka mga Citizen Armed Force Geographical Unit (CAFGU) kag 45 ka mga military officers nga magadumala sa mga ini.
Pasalig ni Dumosmog nga hugot ang ila security preparations kag sa karun wala paman sang namonitor nga threat gikan sa makawala nga grupo.
Suno diri, may nagluntad nga engkwentro sa La Libertad, Negros Oriental, apang sa karun wala sang aktibidad ang rebelde nga grupo sa Negros Occidental.
Sa pihak sini, sila ang may contingency plan man inkaso maglupok ang bulkan kag magakinahanglan nga isaylo ang mga polling places sa mga maapektuhan nga lugar.
