Nagpanugyan ang 3rd Infantry Division sang Philippine Army sa mga aktibista nga maghingyo sang bulig sang gobyerno para sa ila seguridad kun nakabaton gid man ang pamahog nga sila ang ginaalegar masunod nga target sang kill, kill, kill program.
Una na nga ginpahayag sang Karapatan Negros nga pila ka miyembro sang ila grupo ang nakabaton sang mensahe nga nagapaandam nga maghalong bangud sila naman ang masunod nga patyon kag sila ang nagapati nga nagikan ini sa uniformed personnel sang gobyerno.
Sa interview sang Bombo Radyo kay 3rd Infantry Spearhead Division spokesperson Major Cenon Pancito III, indi practice sang militar ang paghingabot sa mga aktibista bangud ila ginakilala nga ang activism ang kabahin sang demokrasya.
Suno kay Pancito, wala sang dapat kahangaw-an kun wala sang malain nga ginahimo bangud ang government troops ang nagalagas man lang sa mga may salabton sa layi.
Kun may nabaton gid man nga pamahog ang mga aktibista suno kay Pancito, iya ginpanugyan sa mga ini nga maghingyo sang bulig sang gobyerno kaangay sang Philippine National Police kag Philippine Army.
Agud masiguro pa gid ang ila nga seguridad suno kay Pancito, sarang gid makahingyo ang mga aktibista nga matinir sa military camps kag sa tion nga may malain nga matabo sa ila, indi na ini mapanginwala sang otoridad.
Suno sa 3rd ID spokesperson, dapat nga maimbestigaran ang akusasyon basta magatuad ang natungdan kun ano nga pamahog ang ila nabaton.
