Philippine Army, preparado na para sa midterm elections

Preparado na ang Philippine Army para sa nagahilapit nga Midterm elections.

Sa interview sang Bombo Radyo Bacolod kay Brigadier General Joey Escanillas, commander, 302nd Infantry Brigade sang Philippine Army, wala untat ang pagpatigayon nila sang checkpoints kaupod ang Philippine National Police ilabi na sa borders sang Negros Occidental kag Negros Oriental.

Suno diri, sa Enero 12, sa pag-umpisa sang election period mas pasanyogon pa gid ang checkpoints.

Sila ang magafocus sa eleksyon agud malikawan ang pagluntad sang krimen kag mapabilin ang kalinong sa area.

Padayon man ang monitoring sang militar sa aktibidad sang mga New People’s Army agud indi madistorbo ang eleksyon kag mahilway nga makaboto ang mga tawo.