Apisar sang suspension sang combat operations kaangot sa ceasefire nga gindeklarar sang gobyerno sang Pilipinas kahapon, gin-athag sang Philippine Army nga yara sila sa gihapon sa full alert status.
Sa interview sang Bombo Radyo kay Captain Cenon Pancito III, Spokesperson sang 3rd Infantry Spearhead Division sang Philippine Army, ginpahayag sini nga nagapati sila sa direktiba sang presidente kag nagasalig sa kaalam sini apang ginpaathag niya nga mando man sa ila nga ubrahon ang ila nga obligasyon sa pagmintinar sang kalinong sa pungsod.
Suno kay Pancito, untaton tanan nga offensive operations ukon ang pag-initiate sang engagement sa New People’s Army (NPA) apang magapadayon ang ila nga defensive operations.
Suno sa iya, magaresponder sila gihapon kun may yara sang report nga nagabayolar ang grupo sa layi bangud mando man sa ila nga mangin alerto sa tanan nga tion para sa seguridad sang mga pumuluyo.
Suno sa spokesperson, may yara man sang ceasefire nga gindeklarar ang kampo sang NPA kag nagalaom ini nga sinsero man sila sa ila pronouncement.
Handom man sang mga sundado suno sa iya nga maangkon ang kalinong paagi sa istoryahanay sangsa gyera.
Ang nasambit nga ceasefire ang epektibo halin Disyembre 23, 2019 sang kaagahon tubtob alas-11:59 sa gab-i sa January 7, 2020.
