Ginsuspendi sang Philippine Olympic Commitee (POC) ang Philippine Athletics Track and Field Association (PATAFA) bangud sa indi pag-endorso sini kay pole vaulter EJ Obiena.
Madumduman nga indi makapakigbahin ang Olympian sa World Indoor championships bangud wala ini gin-endorso sang PATAFA para sa tournament.
Ang request sini nga makigbahin sa Southeast Asian Games, World Championship sa Hulyo, kag Asian Games ang wala man gin-aprubahan sang NSA.
Suno kay POC president Abraham “Bambol” Tolentino, wala naserbi sang PATAFA ang tinutuyo sini bilang National Sports Association.
Suno diri, santo sa konstitusyon, ang POC ang sarang nga makasuspendi sa maskin ano nga rason.
Apang maathag nga ginhungod sang PATAFA ang pagsikway sa basic principle nga pagpromote sang sports kag development.
Gindugang man sini nga ang indi pag-endorso kay EJ ang nagtuga sang national issue.
Si EJ Obiena, sa idalum sang International Olympic Committee Charter, ang may yara sang duha ka mga rason agud i-endorso kag ini ang sports merit kag inspirasyon sa mga kabataan.
Suno kay Tolentino, apisar sang mga efforts ni Obiena nga magmediate, ginhatagan prayoridad sang PATAFA ang bugal sini kag ginakasubo sang POC chief nga makit-an nga amat-amat nga nagapalayo ang tiyansa sang pungsod nga makaangkon sang isa nanaman ka world record.
Gindugang man sini nga ang suspension ang magadugay sang 90 ka adlaw.
Samtang, suspendido man ang Philippine Tennis Association (PHILTA) bangud sa indi sini pagsunod sa mando nagikan sa International Tennis Federation (ITF) nga i-amend ang charter kag magpatigayon sang fresh elections agud makapili sa representative set sang mga board members.
