Wala sang narecord nga maritime accidents sa bilog nga Western Visayas kadungan sang pagtupa sang ulan dala sang southwest monsoon kag Bagyo Dodong.
Suno kay PCG District Western Visayas spokesperson Commander Jansen Benjamin, wala sang suspension sang byahe sang barko bangud wala man sang storm signal sa Region 6.
Kahapon sang hapon, nagcancel sang byahe ang isa ka fastcraft halin sa Iloilo padulong sa Bacolod bangud sa mamadlos nga hangin dala sang southwest monsoon apang nagresume man ang byahe sini kaina sang aga.
Wala man sang narecord nga maritime accidents kag sheltering ukon pagpasalipod sang barko sa nasakupan sang PCG District Western Visayas.
Suno kay Benjamin, padayon ang ila monitoring sa forecast sang weather bureau kag ginalauman nga magagwa na ang bagyo sa Philippine Area of Responsibility karon sa gab-i.
Aminado si Benjamin nga nakahibalo na ang mga mananagat sang timpla sang dagat apang sila ang ginaabisuhan nga magmonitor sa radyo para sa weather update.
