Igapaidalum sa heightened alert ang Philippine Coast Guard humalin Abril 2 tubtob Abril 10 bilang preparasyon sa pagdamo sang mga pasahero sa mga sea ports kag iban pa nga transport terminals bilang pag-obserbar sang Semana Santa.
Sa interview sang Bombo Radyo kay Commander Jansen Benjamin, tagpamaba sang Philippine Coast Guard District Western Visayas, ginalauman na sang mga ini nga magadamo ang volume sang mga pasahero ilabi na sa Abril 5 kun sa diin gin-anunsyar nga half day lamang ang trabaho sang mga empleyado sang gobyerno agud makahingagaw pauli ang mga ini sa Semana Santa.
Suno kay Benjamin, ginapreparahan sang mga security forces ang palaabuton nga holiday kun sa diin sa bahin sang PCG, sila ang magabantay sa mga ports.
Sa Western Visayas, ang mga main ports amu ang San Carlos Port, Escalante Port, Bredco Port sa Negros Occidental; kag Dumangas Port, Iloilo Port, Caticlan Port kag Cadiz Port sa bahin sang Panay.
Suno diri, nagapadayon sa pagtsekyar ang PCG sang mga roro vessels agud masiguro nga maayo ang kahimtangan sang barko kag pasado ini sa standard.
Nagpanugyan man ini sa mga pumuluyo kun may makit-an nga illegal nga ginadumilian nga buluhaton nga ginahimo sa sulod sang vessel, sarang gid nga magreport sa ila Facebook page agud makapakig-angot sa ila.
