May mga pahanumdom ang Philippine Coast Guard karun nga naga-inulan ulan na kag nagsulod na ang Habagat season santo man sa deklarasyon sang PAGASA.
Sa interview sang Bombo Radyo Bacolod kay Commander Artzell M. Anacan Acting Station Commander of Coast Guard Station Northern Negros Occidental kag Deputy Commander of the Coast Guard District Southern Visayas, sa mga magabiyahe mangin updated sa weather update paagi sa pagpamati sa radyo ukon paglantaw sang balita agud malikawan nga mastranded sa mga pantalan kun may yara sang weather disturbances.
Suno kay Anacan, kung may makita nga makaduluda sa pantalan magreport gilayon sa otoridad agud madasig nga marespondehan.
Sa mga mananagat naman mag-log in sa Barangay kun magpalawod agud nga mahibaluan nga sila ang naglakat, kag likawan ang magpanagat sa ginalabayan sang mga dalagko nga barko kaangay sang Roll-on Roll-off vessels (RORO) kag dapat magdala sang mga pagkaon kag iban nga kinahanglanon.
Dugang pa nga dapat siguruhon nga maayo ang kondisyon sang sakayan, kag bisan magagmay lamang nga sakayan may yara gihapon sang angkla agud nga malikawan ang pagkapan kung hinali mapatay ang makina samtang nagalayag.
