Nagapanghanda na ang Coast Guard Sation-Negros Occidental sa pagdamo sang mga pasahero sa holiday season sini nga bulan sang Disyembre.
Sa interview sang Bombo Radyo Bacolod kay Commander Ludovico Librilla, pinuno sang PCG-Negros Occidental, ginpahayag sini nga nag-activate na sila sang passenger assistance center sa kada pantalan sa ciudad sang Bacolod subong man sa probinsya sang Negros Occidental.
Magluwas diri, naga-request naman sila sanga augmentation personnel nagikan sa Coast Guard District Southern Visayas.
Suno kay Librilla ila na ginapaabot nga magadamo ang pasahero nga magagwa kag magasulod sa probinsya sini nga Disyembre.
Ginkumpirmar man sini nga wala pa man sang abiso gikan sa mga shipping companies kun magadugang sila sang trip kada adlaw.
Nagapanugyan si Librilla sa mga pasahero nga sundon lamang ang guidelines kag protocol nga ginapatuman sang gobyerno agud malikawan ang paglapta sang coronavirus.
Kun may yara naman sang problema, ginpahayag sini nga handa ang passenger assistance center sang PCG agud magbulig.
