Ginpahayag ni Rear Admiral Jay Tarriela, spokeperson sang Philippine Coast Guard (PCG) for the West Philippine Sea (WPS), nga ang 2016 Arbitral Award ang nagapamatuod nga wala naga-isahanon ang Pilipinas sa pagpakigbato sa West Philippine Sea.
Sa interview sang Bombo Radyo kay Tarriela, ginpahayag sini nga madamo nga mga pungsod ang nagpabutyag sang suporta sa 2016 ruling.
Kalakip na diri ang European Union nga naga-suporta sa rules-based international order kag pagsunod sa international law.
Apisar nga wala ini ginkilala sang Chinese Government, ginkalipay sini ang padayon ang suporta sang iban nga pungsod.
Apisar sa limitado nga assests sang Pilipinas kun ipaanggid sa kadakuon kag mga barko nga ginapadala sang China sa West Philippine Sea, suno kay Tarriela, padayon ang pagpatrolya sang PCG agud masiguro ang kaluwasan sang mga Pilipino nga mangigisda.
Ginpasalamatan man sini ang panindugan ni President Ferdinand Marcos Jr. sa West Philippine Sea nga suno sa iya, indi lamang sa State of the Nation Address (SONA) ginpakita kundi sa padayon nga polisa halin pa sang una nga adlaw sang pagpungko bilang Presidente.
Sa pihak sini, suno kay Tarriela, ang West Philippine Sea ang indi lamang nahanungod sa seguridad kag indi dapat kabigon nga obligasyon lamang sang PCG kag sang Presidente.
Suno sa Tagmaba, ini ang obligasyon sa tagsa ka mga Pilipino.
Gani, mensahe sini sa subong nga mga henerasyon nga ipakigbato ang mga kinamatarong gikan sa mga Pilipino nga naghalad sang ila kabuhi para sa pugsod kag kahilwayan…Samtang, ginhatagan sang pagtamod ni Rear Admiral Jay Tarriela, spokesperson sang Philippine Coast Guard (PCG) for the West Philippine Sea (WPS), ang importansya sang husto nga impormasyon sa publiko batok sa fake news kag misinformation angot sa isyu sa West Philippine Sea.
Sa interview sang Bombo Radyo kay Tarriela, ginpahayag sini nga importante ang transparency kag padayon nga paghatag sang impormasyon agud mahangpan sang publiko ang sitwasyon sa West Philipiine Sea.
Suno sa iya, isa sa mga pamagi amo ng pagpakig-angot nila sa mga lokal nga estasyon sang radyo kag iban pa nga media agud masabat ang mga pamangkot sang publiko nahanungod sa West Philippine Sea nga makabulig agud malikawan ang misinformation.
Dugang pa ni Tarriela, dako man ang papel sang kabataan batok sa fake news ilabi na sa subong nga madasig ang paglapta sang impormasyon sa social media.// Gani suno sa Tagmaba, importante ang proper education kag active engagement sang mga kabataan.
Sa baylo nga magpalata sang sala nga impormasyon, ginahangkat sini nga gamiton ang social media agud mapaathag sa mga Pilipino ang matuod nga importansya sang West Philippine Sea.
