Naga-average sa 10 mil tubtob 12 mil ka mga inbound kag outbound passengers sa Western Visayas ang nagakarekord kada adlaw subong nga Semana Santa.
Sa interview sang Bombo Radyo kay Commander Jansen Benjamin, operations officer sang Philippine Coast Guard – Western Visayas, nagdamo na ang mga pasahero humalin kahapon sang hapon ilabi na sa Roll-on/roll-off vessels.
Suno kay Benjamin, ila ginatsekyar ang mga bagahe sang mga pasahero agud masiguro ang kaluwasan kag seguridad sang mga ini.
Wala man sang major ukon minor nga insidente nga nagluntad kag wala man sang may nakumpiskar nga illegal nga mga butang.
Suno sa iya, ang PCG ang nakaheightened alert humalin Abril 2 tubtob Abril 10.
Nagapangayo si Benjamin sang malaba nga pasensya sa mga magabyahe bangud sa malaba nga queuing.
Nagpanugyan man ini nga magdala sang tubig agud malikawan ang dehydration kag mag-inom sang maintenance.
Sa karun lima ka mga barko sang TriStar kag apat ka barko sang Montenegro Shipping Lines ang nagabyahe humalin Bacolod padulong Dumangas kag vice versa.
