Ginkilala ang Philippine Dental Association Negros Occidental Chapter bilang outstanding chapter sa ginpatigayon nga Gawad Parangal.
Kadungan sini, ginhatagan man award bilang outstanding president si Dra. Generose Alunan, ang presidente sang PDA Negros Occidental chapter sadtong Hunyo 2019 tubtob Mayo 2020.
Suno kay Alunan, ginalakipan ang Gawad Parangal sang tanan nga PDA chapter sa Pilipinas nga nagadangat sa masobra 100.
Sa ginpatigayon nga aktibidad, napilian man ini nga “star of the day” sa ila nga programa nga may Korean Theme gamit ang costume nga Empress Ki.
May ara sang guidelines kag criteria ang nasambit nga kompetisyon kag kun sin-o ang makapasar sa guidelines ang sarang makaupod sa pagahusgaran.
Nakabase man ang pagpili sa mga proyekto sang kada chapter.
Suno kay Alunan, nangin sentro sang iya administrasyon ang “Tahanang Sentrong Pangkalusugan” ukon mga health center kag isa sa napatukod sini amo ang sa Barangay Bagong Silang, Don Salvador Benedicto, “Ngipon ko Palangga ko” sa Manapla, “Balay ko Bukambibig” sa Valladolid kag ang programa para sa mga senior citizen kag school board children sa Sipalay City.
Suno sa doktora, may mabaskog na nga pwersa nga nagatrabaho sa Negros Occidental kadungan sang edukasyon nga gintukod para sa kaayuhan sang mga pumuluyo kag agud mapasanyog ang dental profession.
Nagbatun naman ini kag ang chapter sang balor nga tag-P10,000 samtang nagbatun naman ini sang P3,000 para sa star of the day.
Suno kay Alunan, madamo pa sang mga panibag-o nga programa nga gintukod ang panibag-o nga adminsitrasyon, samtang ginapadayun naman ang pila sini ka mga nasuguran.
Nagpasalamat man ini sa tanan nga nagsuporta sa iya.
