Ginpahayag sang Philippine Embassy sa Yangon, Myanmar nga wala sang reports nga may napilasan nga Filipino matapos gintay-og sang magnitude 7.7 nga linog ang pungsod sang Biyernes sang hapon.
Sa statement sang Embahada, hugot sini nga ginamonitor ang sitwasyon kag magahatag sang updates samtang nagasaka ang developments.
Sa karun, suno sa embahada, wala sang reports sang halit ukon casualties nagikan sa kapin 811 registered Filipino nationals nga nagatinir ukon nagatrabaho sa Myanmar.
Samtang sa Thailand, ginpahayag man sang Philippine Embassy sa Bangkok nga wala sang Filipino nga nahalitan ukon naapektuhan sang linog nga nagtay-og sa northern kag central regions sang pungsod, lakip na sa capital city.
Sa data sang Department of Foreign Affairs, may yara sang kapin 32,950 ka mga Filipino sa Thailand.
