Wala nakabulig ang Philippine Embassy sa 50 ka Pinoy agro students sa Israel sa ila nga paglupad pabalik sa Pilipinas.
Sa interview sang Bombo Radyo Bacolod kay Jheraldin Villan, nagatrabaho sa Romblon National Institute of Technology bilang administrative aid, nagpangayo sila sang bulig sa Philippine Embassy nga makabalik sa Ashkelon bangud tuman ka delikado, apang wala sang reply.
Bangud ginpahayag sang ila coordinators nga hilway maggwa, nagrisgo sila nga magbyahe bangud wala sang nahatag nga assistance ang embahada.
Naggamit sanday Villan sang public transportation agud nga makabalik sa Ashkelon kag makakuha sang ila gamit bangud Oktubre 11 na ang ila flight.
Suno kay Villan, ang ginbuligan sang national government amo ang mga overseas Filipino workers nga naglupad kahapon kasunod sang repatriation efforts kag magaabot subong nga adlaw.
Suno sa agro student, antes pa ang repatriation, nakaschedule na ang ila flight pabalik sa Pilipinas kaupod ang 50 ka post graduate agro students sa Israel.
Sa karon, nakapauli na si Villan sa Romblon gani thankful kag nakahibi ang iya pamilya nga nakapauli ini nga kumpleto bangud nakahibalo ang iya pamilya sang ila ginahamtangan nga malapit sa Gaza.
Wala naman sang nabaton nga financial assistance sanday Villan bangud nakapauli ang mga ini antes ang mandatory repatriation.
