Wala pa sang schedule kun san-o magasugod ang registration para sa Philippine ID para sa mga pumuluyo sa Negros Occidental.
Miyerkules nga adlaw, ginpahayag ni Socioeconomic Planning Secretary Ernesto Pernia nga gintalana sa Setyembre 2 tubtub bulan sang Disyembre ang pilot testing sa registration sa Philippine ID, santo sa mandu sang Philippine Identification System Act.
Suno kay Pernia, 10, 000 ka mga Pilipino ang target nga marehistro sa pilot testing kag kun maperpekto na ang sistema, magasaka ini sa masunod nga tuig.
Sa interview sang Bombo Radyo Bacolod kay Philippine Statistics Authority Negros Occidental head Luis Gonzales, wala pa nakaabot sa ila opisina ang mga equipment nga kinahanglanon para sa registration apang natukod na ang isa ka division nga magatutok lamang sa pag-issue sang Philippine ID.
Nahibaluan nga ang national ID ang maga-contain sang full name, sex, date of birth, place of birth, blood type, address, Filipino ukon resident alien, marital status, mobile number, email address kag biometric information nga ginalakipan sang front facing photograph, bilog nga set sang fingerprints kag iris scan.
