Naga-apelar ang presidente sang Philippine Nurses Association (PNA) Negros Occidental Chapter sa mga residente sa ciudad sang Bacolod kag sa probinsya sang Negros Occidental nga untaton ang pagdiscriminate sa mga frontliners kadungan sang COVID 19 threat.
Sa interview sang Bombo Radyo Bacolod kay Bethel Basinang, ginpahayag sini nga ang mga healthcare workers ang nagabulig sa pag-away batok sa Covid-19 gani dapat intindihon nga sila ang nagasakripisyo kag nagaatubang sa risgo sang ila trabaho.
Suno kay Basinang, dapat respetuhon kag hatagan sang importansya ang mga healthcare workers sa baylo nga idiscriminate ang mga ini.
Gindula sini ang kahangawa sang mga residente bangud mismo ang ospital nga ila ginatrabahuan ang may ginasunod nga isolation kag quarantine protocol sa tion nga nakaatender sila sa COVID patient.
Ginahimo man sang ini ang husto nga sanitation procedure antes sila magpauli agud indi sila makadala sang virus sa ila pamilya.
Samtang, nagpasalamat ini sa tanan nga mga tawo nga nagapadayon sa paghatag sang pagkaon kag iban pa nga mga kinahanglanon sa mga healthcare workers kag frontliners.
Suno kay Basinang, bilang tiglawas sang mga healthcare workers sa probinsya, lubos sila nga nagapasalamat sa mga indibidwal kag pribado nga mga grupo nga nagapadayon sa pagbulig sa mga healthcare workers. Samtang, aminado ang presidente sang Philippine Nurses Association (PNA) Negros Occidental Chapter nga bentaha kun mahatagan sang ciudad kag probinsya sang Negros Occidental sang pasilidad ang mga healthcare workers nga ila mapahuwayan pagkatapos sang duty sa ospital sa tunga-tunga sang pamahog sang coronavirus disease.
Sa interview sang Bombo Radyo Bacolod kay Bethel Basinang, ginpahayag sini nga ang mga healthcare workers ang nakapoy man sa ila ubra gani ginakinahanglan sang mga ini sang mapahuwayan.
Magluwas nga kinahanglan sang frontliners sang mapahuwayan suno kay Basinang, ang pasilidad ang kinahanglanon man para sa seguridad sang mga ini batok sa mga nagapangdiscriminate sang mga health workers.
Dugang pa ni Basinang, wala man sang dapat kahangaw-an ang mga pumuluyo nga malatnan sang virus paagi sa mga healthcare workers bangud may mga proseso ang mga ini nga ginasunod agud malikawan ang paglapta sang virus.
Samtang, ginpasalamatan man ni Basinang ang isa ka pribado nga kompaniya sa pagpagamit sang pila ka unit sang mga bus sini sa mga healthcare workers agud magdul-ong kag magsugat ilabi na sa karun nga ginpatuman na ang Enhanced Community Quarantine (ECQ).
