Ginbuksan na kahapon ang ikalima nga molecular laboratory sa probinsya sang Negros Occidental nga nahamtang sa building sang Philippine Red Cross Bacolod City-Negros Occidental Chapter.
Sa interview sang Bombo Radyo Bacolod kay Philippine Red Cross Governor Jay Jalandoni, sang bulan sang Mayo pa gin-umpisahan ubra ang molecular laboratory.
Aminado man si Jalandoni nga madamo sang gin-agyan nga proseso sang molecular laboratory antes gin-aprubahan sang Research Institute for Tropical Medicine (RITM).
Nahibaluan nga ang apat ka kwarto sang anay care giver training rooms sa building sang Redcross ang ginhimo nga molecular laboratory.
Ginpadala man gilayon sang central office sang Red Cross ang mga machines nga ginagamit sa pagpatigayon sang swab test matapos nga makuha ang approval sang RITM.
May yara sang mga nakahanda nga walo ka mga medical technologist nga nakapasar sa proficiency test nga nakapaidalom sa training sa Manila ang ibutang sa molecular laboratory kag indi sila makagwa sa sulod sang tatlo ukon apat ka bulan bilang kabahin sang security measures nga ipatuman.
Ang molecular lab ang makaakomodar sang 2,000 ka mga swab test apang sa karun amat-amaton lamang nila ini gamit ang automated RNA extractor.
Ang PRC suno kay Jalandoni ang may pinakabarato nga swab test fee nga P4000 sa private person samtang P3500 naman ang sa government.
Kaangay man sang iban nga molecular laboratory ang set-up sang molecular laboratory sang gintukod nga molecular laboratory sa Philippine Red Cross- Bacolod City Chapter.
Suno kay Chapter Administrator Rita Benita Mirasol, may yara sang duha ka PCR machine kag RNA extractor ang molecular laboratory kun sa diin sarang nga makaproseso sang 2,000 ka mga swab samples.
Suno diri, ang una nga testingan amo ang mga staff kag volunteers sang PRC-Bacolod City Chapter.
Sarang man nga mabayaran sang mga nagpaswab test sa PAY MAYA kag iban pa nga mga payment centers bangud may yara sang mga payment centers nga gintransact ang Red Cross kag nakapirmahanay na sila sang Memorandum on Agreement (MOA).
Wala man sila nagabaton sang walk in bangud kinahanglan sang mga kompaniya ukon Local Government Unit nga kinahanglan nga magpaschedule santo man sa MOA.
