Nagapanawagan ang donor recruitmet officer sang Philippine Red Cross Bacolod City – Negros Occidental chapter nga magdonar sa palaabuton nga Dugong Bombo Blood Letting Activity sa Nobyembre 15.
Sa interview sang Bombo Radyo Bacolod kay Maray Joyce Louise Rebadomia, madamo sang mabuligan sa pagdonar sang dugo ilabi na sa karun nga madamo ang nagakinahanglan sang blood transfusion.
Partikular na sa mga apektado sang kalamidad, kasubong man sa nagasaka nga kaso sang dengue.
Suno diri, ang dugo nga ginadonar ang sarang makasalbar sang tatlo ka kabuhi, bangod ang dugo ang magamit bilang pack sang red blood cells (rbc), ukon sa platelet kag plasma transfusion.
Panugyan sini sa mga magadonar nga magtulog sang anom tubtob walo ka oras, mag-inom sang madamo nga tubig, light breakfast lamang ang kaunon kag indi na magkaon duha ka oras antes ang pagpakuha sang dugo, mag-inom sang maintenance kaangay sa hypertension agud malikawan nga magsaka ang blood pressure, kag kinahanglan nga 50kg ang kabug-aton para sa mga firstimer.
Samtang ang mga 16 tubtob 17 anyos ang pangitaan naman sang parental consent.
Pahanumdom naman ni Rebadomia nga dapat may tatlo ka bulan ang gap sa pagdonar sang dugo, indi man pwede nga mag-inom sang alcoholic beverages sa sulod sang 24 oras, magpanigarilyo sa sulod sang lima ka oras kag magkaon sang heavy meals ukon matambok kag mamantika nga pagkaon sa sulod sang tatlo tubtob apat ka oras antes magpakuha sang dugo.
Mahimo lamang makapakuha sang dugo ang diabetic kun oral medication lamang, kag indi pwede ang mga naga-inject sang insulin.
Kasubong man nga indi makadonar ang may sexually transmitted disease – Human Immunodeficiency Virus (STD-HIV) kag iban pa nga balatian nga makalatun paagi sa blood transfusion.
Samtang ang Philippine Red Cross ang wala na sa karun nagacater gamit ang donors card bangod madamo sang nagabaligya sang ila card sang tubtob sa P1,200.
Gani sa karun sila ang nagabatun na lamang sang referral slip kaangay sa sarang makuha sa Bombo Radyo.
Apang ang nakadonar lamang sa Dugong Bombo ang mahatagan sang referral bangod ini ang nagaserbe nila nga pondo sa blood bank inkaso may-ara sang emerhensya.
