Nagahingyo ang Donor Recruitment Officer sang Philippine Red Cross sa mga pumuluyo nga may ikasarang nga magdonar sang dugo nga makigbahin sa ila blood donation program bangud ginakulang sa karun ang supply sang dugo sa blood bank.
Sa interview sang Bombo Radyo kay Eloisa Marie Liza, ginpahayag sini nga tuman ka nubo kag ginakulang sa karun ang supply sang dugo sa Philippine Red Cross sumugod sang ginpaidalum sa modified enhanced community quarantine (MECQ) ang Bacolod.
![](https://img.bomboradyo.com/bacolod/2020/09/red-cross-01.jpg)
Suno kay Liza, bangud sa pandemic, nagadiutay na ang blood donors subong man ang supply rason kun ngaa indi gid sila makasupply sa mga pumuluyo sang ciudad kag probinsya.
Suno diri, nagapatigayon man sila sang mga blood donations sa mga local government units (LGU) apang indi gihapon kaigo ang nagakatipon nga dugo.
Nag-abiso ini sa mga nagakinahanglan nga magkadto lang sa PRC kag magpresentar sang blood request kag kun may available, sarang sila nga mahatagan apang kun wala, sila na lang mismo ang madala sang donor.
Suno sa iya, masami sila nga ginakulang bangud nagasupply man sila sa mga ospital nga nagakinahanglan.
Gani nagapanawagan ini sa mga pumuluyo nga kun maayo man lang ang lawas, wala sang travel history kag ginakabig nga “fit”, magdonar na sang dugo agud makabulig man salbar sang kabuhi.
Suno kay Liza, may patigayunon nga blood letting sa Setyembre 22 kag Setyembre 29 sa gym sang Brgy. Montevista, Bacolod City kun welcome gid ang tanan nga luyag magdonar.
Ang mga sarang nga makadonar amu ang mga naga-edad 16 tubtob 65 anyos apang nagakinahanglan sang parent’s consent ang mga menor-de-edad samtang dapat nakadonar naman sang dugo antes ang ika-61 nga kaadlawan ang mga senior citizens.
Dapat man nga physically fit kag maayo ang lawas sang donor, nagabug-at sang masobra 50kg kag wala nagasuprer sang mga balatian kaangay sang ubo, sip-on ukon trangkaso.
Suno diri, kinahanglan lang nga magdala sang quarantine clearance nagikan sa barangay nga nagapamatuod nga indi ini person under investigation (PUI), person under monitoring (PUM) ukon positibo sa virus; kag valid ID.
Kinahanglan man nga magsuksok sang face mask kag face shield.
Wala man sang dapat kahangaw-an ang mga luyag magdonar bangud magasuksok man sang personal protective equipment (PPE) ang mga medical workers kag hugot nga ipatuman ang health protocols.