Gina-agda sang Philippine Red Cross Bacolod City – Negros Occidental Chapter ang publiko nga magdonar sa palaabuton nga Dugong Bombo Blood Letting Activity nga patigayunon sa City Mall Mandalagan, Bacolod City sa Nobyembre 14.
Kahapon sang aga, opisyal nga ginlusar ang Dugong Bombo Blood Letting Activity nga programa sang Bombo Radyo Philippines.
Sa interview sang Bombo Radyo Bacolod kay Rita Benita P. Mirasol, Administrator sang Philippine Red Cross, Negros Occidental Chapter, ang aktibidad ang masobra duha na kadekada nga ginapatigayon agud makabulig sa mga nagakinahanglan nga pasyente kag sa pamilya sini.
Gina-agda sini ang tanan nga healthy individual nga magdonar sang dugo.
Suno kay Mirasol, luwas nga makabulig sa isigkatawo, makabulig man ang pagdonar sang dugo ini sa ikaayung lawas sang tawo.
Ini bangud suno sa iya, madamo ang nagahambal nga nangin magaan ang ila pamatayag matapos sila nga makuhaan sang dugo.
Gani, nagabalik ang mga ini sa blood letting site kada matapos ang tatlo ka bulan agud magdonar liwat sang dugo.
Para naman sa mga indibidwal nga indi pwede makadonar, gina-agda ni Mirasol nga magpangrecruit ang mga ini sang iban nila nga pamilya ukon kakilala.
Ginapanawagan naman sini sa mga Local Government Unit nga buylogan ang mga kaangay nga aktibidad nga makabulig sa mga pasyente nga wala sang ikasarang nga magbakal sang dugo kasubong man sa ila nga pamilya.
