Nakahanda na ang Philippine Team nga magmartsa sa opening ceremony sang Paris Olympics.
Suno kay Philippine Olympic Committee (POC) President Abraham “Bambol” Tolentino nga pagapangunahan nanday Pinoy boxer Nesthy Petecio kag Carlo Paalam ang parade kaupod ang 16 ka iban nga mga atleta.
Samtang, indi makaupod si Tolentino sa parada bangud ginpili sini nga magpungko sa family section sa kilid sang River Seine.
Makaupod nanday Paalam kag Petecio ang kapareho nga boksingero nga sanday Aira Villegas kag Hergie Bacyadan, hurdlers Lauren Hoffman kag John Cabang Tolentino, swimmers Kayla Sanchez kag Jarrod Hatch, gymnast Aleah Finnegan kag fencer Samantha Catantan.
Nakasakay naman sa bangka nga gintalana para sa Pilipinas sanday Chef de Mission Juanito Victor “Jonvic” Remulla kag pila ka sports officials nga sanday Michael Angelo Vargas sang swimming, Marcus Manalo sang boxing, Cynthia Carrion Norton sang gymnastics, Patrick Gregorio samg rowing kag Agapito “Terry” Capistrano sang athletics.
Indi naman makaupod ang mga boxers nga sanday Eumir Marcial, gymnast Carlos Yulo kag rower Joanie Delgaco bangud naga-training ang mga ini sa ila tagsa ka hampang sa adlaw sang Sabado samtang si pole vaulter EJ Obiena ang nakatutok sa iya nga pre-game preparations sa Normandy.
Samtang ang tatlo ka weightlfters nga sanday Vanessa Sarno, John Febuar Ceniza kag Erleen Ann Ando ang wala pa natapos sa ila nga training sa Metz kag nakatalana nga mag-abot sa Olympic Village sa Agosto 6.
Magakumpleto sa 22 ka atleta sang pungsod amo sanday gymnast gymnasts Emma Malabuyo kag Levi Ruivivar, golfers Bianca Pagdangan kag Dottie Ardina kag Judoka Kiyomi Watanabe.
Magasugod ang opening ceremony alas-7:30 sang gab-i sa Paris ukon ala-1:30 sang kaagahon sa Pilipinas sa Sabado, July 27.
Mangin makasaysayan naman ang nasambit nga Paris Olympics bangud indi ini pagahiwaton sa isa ka stadium kundi sa River Seine.
