Ginpasiguro sang pamunuan sang Philippine Olympic Committee ang regular nga paghinun-anon sa Team Philippines nga yara sa France kadungan sang nagapadayon nga training sang mga atleta.
Suno kay Bachmann, kaupod sang committee ang embahada sang Pilipinas sa France nga nagalantaw sa sitwasyon sang mga atleta kag iban pa nga bahin sang Philippine Contingent.
Paathag sini, naggasto ang Pilipinas sang tubtob sa P21 million nga pondo para sa training camp, pamasahe kag inisyal nga mga naggasto sang gobyerno agud dalayon nga mapreparar ang mga atleta sang pungsod sa pinakadako nga tournament sa bug-os nga kalibutan.
Sa karun, nagakaigo naman ang pondo para sa nasambit nga tournament paagi naman sa pagbululigay sang mga ahensiya sang gobyerno, mga Senador kag iban pa mga opisyal sang pungsod.
Ginpasiguro ni Bachmann nga ginabantayan nila ang kahimtangan sang Team Philippines agud nga masiguro ang maayo nila nga kahimtangan kag ikaayong lawas.
Samtang, natalana naman nga magbiyahe sa July 22 padulong a France si Bachmann agud nga makita mismo ang sitwasyon sang Team Philippines nga pila na ka adlaw naman nga nagapabilin sa nasambit nga pungsod.
