Ginkumpirmar nga 41 tanan ka volcano-tectonic earthquake ang narekord sa Bulkan Kanlaon humalin alas-11:00 sang gab-i sang Sabado tubtob alas-10:00 kahapon sang aga.
Sa interview sang Bombo Radyo Bacolod kay Pearly Sianson, science research specialist sang Philippine Institute of Volcanology and Seismology (Phivolcs) – Kanlaon Volcano Observatory, 41 tanan ka volcano-tectonic earthquake ang narekord sa Bulkan Kanlaon humalin alas- 11:00 sang Sabado sang gab-i tubtob alas-10:00 kahapon sang aga.
Ang kabaskugon sang mga linog ang yara sa magnitude 0.8 tubtob magnitude 4.6.
Ang pinakamabaskog diri amo ang intensity 3 nga nabatyagan sa La Carlota City, Negros Occidental, Bacolod City kag Canlaon City, Negros Oriental kasubong man sa Bago City, Murcia kag La Castellana, Negros Occidental.
Ang volcano-tectonic earthquake nagaluntad kun makusog ang paghulag sang mga bato sa idalum sa pagsaka sang magma.
Nagdangat naman sa 1,122 tonnes per day ang Volcanic sulfur dioxide (SO2) gas emissions nga narekord kahapon.
Ginapahanumdom sa publiko nga yara sa gihapon sa alert level 2 ang status sang bulkan kag ang pagsaka sang volcano-tectonic earthquake events ang makatuga sang phreatic eruptions ukon weak to moderately explosive eruptions.
Pasalig sang Phivolcs nga ginapatigayon ang close monitoring sa Bulkan kag kun may bag-o nga mga development ini ang ila ipalab-ot sa publiko.
Ang volcanic tremors ang nagakatabo bangud ang magma ang nagapangita sang maagyan sini agud nga makasungaw.
